《銀幸》第一對客人

客人搵得《銀幸》,就係一個互信嘅開始。

《銀幸》慶幸接到嘅第一單生意,就係一對非常信任我哋嘅客人。依對客人用一見如故嚟形容都唔過份,我哋之間嘅溝通就好似認識咗好耐嘅朋友。

令我哋感動嘅係,喺《銀幸》草創初期,能夠提供畀客人嘅設計參考有限。但依對客人都選擇畀咗一個機會《銀幸》去發揮專長。

仲記得當時兩位新人都鍾意動物,特別係雀仔,就算去到外國都會影好多雀仔同鴨仔嘅相,認真係一對「撚雀之人」。佢哋好希望喺喜帖上可以有一對靚雀,但佢喺市場上搵咗好耐都未揾到心水嘅喜帖,直到喺偶爾嘅情況下搵到《銀幸》,而我哋又咁啱有訂製喜帖服務。

《銀幸》為咗依對投下百份百信任嘅雀痴,認真咁思考雀仔同喜帖嘅關聯。

雀仔本身有好多唔同嘅喻意,喺喜帖上,設計師自然聯想到將「喜」同「雀」兩個元素扣埋一齊,所以決定拎客人最鐘意嘅一對雀進行壓印,以最有質感嘅方式呈現設計。

「質感」係喜帖設計一個重要元素,《銀幸》選擇咗一款450g嘅意大利綿紙作為喜帖用紙,依款綿紙最大特點就係份量十足,非常合適用嚟壓印,壓印出嚟嘅效果深淺有度,客人同設計師都非常滿意。

除咗喜帖,《銀幸》仲為客人做咗一張證婚卡,並用「印銀」加工。印銀比燙銀內儉,低調得嚟又有暗光,令喜帖同證婚卡同時呈現出整體連貫性同和諧。

依次創作嘅過程入面,客人同設計師一直都傾談甚歡,最後客人更委托《銀幸》為佢哋嘅婚禮會場set dresser。婚禮完結之後我哋仍然同客人有一個友好嘅關系。

《銀幸》創立嘅願景,就係透過創作,建立人與人之間嘅聯繫,但願我哋能一直堅持,令設計不止於於設計。